terça-feira, 4 de maio de 2010

Destruiçom do património

Oia permite desfazer um jazimento rupestre para a plantaçom de kiwis

O governo local (PP) despreza o interesse patrimonial e defende "mirar ao futuro" para justificar a destruiçom destes achados catalogados.

A condiçom de bem de interesse cultural do jazimento rupestre de Boa-Ventura, também chamado d'O Sobreiro, na paróquia de Burgueira, nom conmove a actuaçom do Concelho de Oia que optou por ignorar na prática a sua existência à hora de autorizar no lugar umha plantaçom massiva de kiwis. Catalogado desde há tres anos, trata-se dum conjunto rupestre que os expertos valoravam ademais especialmente pelas suas características, ja que é um gravado pouco habitual neste tipo de pedra louseira a pê de costa. A afectaçom da plantaçom kiweira chega também a um jazimento próximo que é evidência dum grande assentamento romano na zona.

O alcalde justifica a actuaçom
"Non hai queixa veciñal de ningún tipo", sublinha o alcalde de Oia, Alejandro Rodríguez (PPdeG). "Iso, sexa o que sexa, é algo que estaba por aí agochado atrás duns pinos e terra", insiste o regedor, para quem nom está claro que no lugar exista ou existise jazimento ou gravado nenhum protegido patrimonialmente. "Diso ninguén sabía", teima Rodríguez.

Interpelado ao respeito da existência dumha comunicaçom da delegaçom provincial da Junta para a paralizaçom das obras, Alejandro Rodríguez afirma-se profundo conhecedor do património do município que governa e reitera que "diso ninguén sabe se é ou non xacemento ningún". A continuaçom, Rodríguez, que esta quinta feira em declaraçons à prensa local já chamara a "mirar ao futuro" em defesa da autorizaçom à plantaçom de kiwis, afirma que se trata dumha grande extensom de térreo com potencial produtivo e chama a nom perder a geraçom de emprego no concelho por "algo que non está comprobado". "Asumirei as responsabilidade que tenha que assumir", resposta o regedor, "e dios queira que sexa mentira, porque haberá denuncia contra os que din que se destruíu igual que haberá denuncia a Patrimonio por non ter avisado o concello se se proba que si existía un xacemento".

Desde o IEM sublinham que a plantaçom podia ser perfeitamente compatível com a conservaçom de gravados e jazimento. "Poderíase conservar todo sen afectar a explotación" e criticam o proceder do governo local e em especial do alcalde. "Era para metelo no cárcere directamente", acusam.

Petróglifo antes de passar as máquinas

A rocha posteriormente desfeita

Sem comentários:

Enviar um comentário